政情：霍建寧舊年收入增23％

和黃嘅3G業務去年取得佳績，作為李嘉誠得力助手嘅霍建寧當然出咗唔少力。和黃年報顯示，霍大班呢位打工皇帝，去年就獲加薪23%，令舊年所獲嘅薪酬增至1.53億元。除霍大班外，身兼長實同和黃副主席嘅李澤鉅，舊年喺系內公司所獲嘅總薪金亦突破1億大關。長和系內同時有兩位管理層獲過億人工，在本港上市公司嚟講，都可算係一個紀錄！

3G有錢賺、和黃港託分拆成功，再加埋熱烘烘嘅匯賢，長和系管理層為股東賺取回報嘅能力可見一斑。霍大班舊年嘅基本薪酬雖然只係略略增加7萬至1,029萬元，但同表現掛鈎嘅花紅，就比之前一年增加26.1%至1.41億元，加埋袍金、花紅同公積金，成份人工達到1.53億元。

參考埋長實嘅年報，亦留意到李澤鉅去年喺長實共收5,061萬元嘅薪酬，再計入佢喺和黃同長建所獲嘅薪酬，扣除部分「上繳」畀公司嘅金額，李澤鉅去年喺公司實收嘅人工，由對上一年嘅8,959萬元增至去年嘅1.03億元，正式成為長和系內第二位人工過億嘅管理層。