政情：李月華戴「朱義盛」閃爆
朱太李月華嘅心血金利豐，正式注入上市公司黃金集團，仲改埋名做金利豐金融，尋日喺四季酒店開酒會，好多城中名人都畀面到場，但最搶眼嘅仍然係女當家朱太，佢一身火紅色套裝，再戴上全套鑽石耳環、頸鏈同戒指，粒粒睇嚟都有十幾卡咁大，閃爆全場。記者問佢套首飾要幾多千萬元？佢就笑得好甜咁話：「係老公送o架，佢話係假嘢喎！」吓！係「朱義盛」？講都冇人信啦！
朱太話，金利豐成功引入平保同西京做策略股東，將來有好多合作機會，而成功變身上市公司，就有個平台進一步發展金融業，今年目標係引入外國企業來港上市同投資中港市場，希望引入東歐、南美同非洲公司，特別係資源企業來港上市，依家就處理緊兩家內地企業嚟香港上市。
李月華
