政情：大舊幫林公公開刀

上禮拜四通完波仔後火速返工嘅政制及內地事務局局長「林公公」林瑞麟，想證明自己身體無恙，但政圈中人就覺得佢係博上位。不過，若果佢真係咁OK嘅話，上禮拜五返咗半日工，跟住休息咗兩日，理應抖足精神喇啩，但尋日佢又只係返咗半日工咋喎！大家點睇？

林公公講明今日會返全日，跟住要處理應付預算案辯論、選舉經費上限等。講到咁多嘢做，其實最真嗰句係備戰聽日嘅預算案辯論，事關佢將會畀議員「鋸完又鋸」。

促刪除 政制局開支

點解咁樣講？本來包埋財爺鬍鬚曾「跪低」派錢方案在內，總共有十七項修訂議案，當中除咗林公公自己個局要被開刀刪除開支之外，人民力量嘅立法會議員「大舊」陳偉業又提出多五項修訂，刪走幾個政策局預留嚟請副局長同政治助理嘅開支，副局政助都屬於林公公嘅範疇，怕且佢真係要好好諗吓點掹嘞！

依家未請到人嘅，包括發展局同勞工及福利局嘅副局，政助空缺就嚟自運輸及房屋局、商務及經濟發展局同政制及內地事務局。大舊就係針對呢幾個政策局開刀，刪走佢哋合共預留一千一百六十萬元副局同政助嘅年薪。

大舊咁做都不無道理，睇吓商務及經濟發展局，自局長劉吳惠蘭因病請辭後，呢幾日傳出嘅接棒人選都有好幾個，就係冇該局副局蘇錦樑份。歸根究柢，一嚟蘇副局上任後鬧出唔少風波，加上佢處理嘅競爭法劣評如潮，令唔少人對佢敬而遠之；二嚟亦反證明煲呔曾當初係威係勢咁力推嘅副局政助制度唔掂。

蘇副局尋日到立法會開會回應議員提問時，顯得如履薄冰、步步為營，會後被追問接棒一事，佢就保持沉默，只係叮囑追訪佢嘅記者落樓梯時小心啲，真係情何以堪。