婦產齋噏八萬八 醫療商機變危機

大家仲記唔記得八萬五？本港回歸之初，樓市高企，普羅市民望樓興嘆，董建華度咗條橋，話要保證每年供應八萬五千個住宅單位，令樓市平穩發展咁話。誰不知，樓市直插谷底，無數物業淪為負資產，業主鬼殺咁嘈。見過鬼怕黑，好多人日前一聽見食衞局局長周一嶽講到八萬八，就嚇到鼻哥窿冇肉。

件事係咁嘅，近年內地孕婦湧嚟香港生仔，公立醫院產房逼爆，唔單止令醫護人員做到得閒死唔得閒病，仲影響本港孕婦分娩，因此要求政府限制內地孕婦來港。周一嶽開頭死撐，話咁做唔人道喎，後來睇見公院產科醫護大逃亡先至識驚，宣布要將全港婦產科服務名額控制喺每年八萬八千人。

周一嶽嘅八萬八同老懵董嘅八萬五同樣不得人心。政策一公布，私家醫院聯會就講到明唔會減收內地孕婦。咁又係嘅，限制內地孕婦來港，公立醫院醫護人員梗係拍爛手掌啦，因為無論做幾多個，接生費都唔會入佢哋嘅袋。私家醫院就唔同，做一個算一個，多多益善。

如果內地孕婦湧晒去私家醫院，咁就大鑊嘞，私家醫院人手唔夠，惟有向公院挖角，到時公院婦產科一定出現新嘅大逃亡。

仲有，私家醫院包接生唔包醫療，BB有乜唔妥，通常都會送去公立醫院，搞到公院初生嬰兒深切治療部爆晒燈，本港細路有急症反而得唔到及時治療。

其實限制內地孕婦來港數目，講就易啫，做起嚟就難。政府規定，以後內地孕婦去公立醫院分娩一律要預約，冇預約唔收。之不過，如果有孕婦到臨盆前先至求診，唔通將佢趕走咩？

好明顯，周一嶽度橋嘅時候根本冇考慮本港嘅實際情況，更冇諗過配套設施。做嘢咁盲摸摸，唔撞板至奇。

講番轉頭，大批內地孕婦嚟香港生細路，本來係好事嚟嘅。現時香港生育率低，係因為香港人生唔起、唔敢生，搞到要縮班殺校；而內地同胞就唔同，佢哋生得起、鍾意生，可惜受計劃生育限制。內地孕婦帶肚嚟香港生，實在係一家便宜兩家着，何樂而不為。

港府吹水唔抹嘴，話要發展醫療產業，家陣內地產婦都要交高額接生費，每年閒閒地有幾十億商機，正係發展醫療產業大好時機。可惜周一嶽等人淨係識齋噏，除咗預留咗幾塊地皮之外，乜都冇做到，遑論增撥資源培養醫護人員，醫療產業紙上談兵，惟有眼白白睇住商機消失，仲搞到醫療系統七國咁亂。

講鬼咩，呢班庸官一味喺度等收工，根本冇心機做嘢，有乜法子唔係好事變壞事，商機變危機呀。叮佢個鎯鎯！