政情：蘇浩文仔女勤練普通話
滙豐環球投資管理署理亞太區行政總裁蘇浩文（Edmund Stokes）有兩個仔女，佢雖然係英國人，但原來佢好重視普通話，所以佢嘅八歲囝囝同六歲囡囡每日都會用大約一個鐘頭學普通話，可謂入鄉隨俗。
初時以為Edmund「煲冬瓜」一定係頂呱呱，原來唔係。佢除咗英文外，自己學過多種語言，例如德文、荷蘭文、日文，偏偏就冇學普通話。佢話，雖然學咗日文，差不多有成二十年冇用過，依家已經唔係好熟練嘞，希望遲啲有時間學普通話。
老實講，佢兩個心肝寶貝日日操練普通話，隨時可以教爸爸「煲冬瓜」，掉轉頭做爸爸嘅老師喎！除咗入鄉隨俗學普通話之外，佢又話好鍾意香港嘅人、天氣同食物。
蘇浩文（右二）話自己學過多種語言，例如德文、荷蘭文、日文，偏偏就冇學普通話。