政情：新立會廣場示威可被逐
立法會議員喺議會內搞事，可以透過收緊《議事規則》趕佢哋離開議事廳，至於其他人想喺立法會搞事，就要出動《立法會（權力及特權）條例》嚟對付。立法會今年就會搬，為咗確保立法會主席去到新大樓之後，繼續有權出「紅牌」趕滋事者出場，立法會秘書處尋日決定修改有關指令。
新嘅指令包括新大樓成幢樓，無論係議事廳，抑或前廳、後廳同花園都包括在內，換言之將來立法會開緊會，而示威人士喺新大樓出面嘅立法會廣場嘈喧巴閉，主席覺得唔滿意，照樣有權出「紅牌」趕人走。秘書處打算新嘅指令會喺今年九月新大樓啟用前就實施適用。
其實更重要嘅係，法例賦予立法會議員特權，喺佢哋往返立會開會途中，可以免被逮捕；議員發言亦受到保障，唔會因為佢哋嘅發言而被控誹謗。