政情：副局冇鬼用 陳維安搞乜衰乜

政府以高薪請番嚟嘅副局長同政治助理，原意係做政府嘅政治化妝師，幫政府拆彈，點知適得其反，啱啱又爆大鑊。

眾所周知，教育局副局長陳維安上任後，獨沽一味搞電子書，事關政府話推電子書可以減輕家長書簿費嘅負擔，但佢上場兩年後，電子書都係只聞樓梯響，到推出一系列建議後，亦係得個噏字，學校話冇資源買教材，又冇能力可以畀班學生一人一電腦。死結難解，於是擱置咗。

電子書分拆教材喎晒

電子書問題未解決，教育局就向課本埋手，話要分拆課本同教材，咁書價就會平啲，陳維安同啲書商開完會後，係威係勢咁單方面出嚟話已經同書商達成共識，宣布今年九月就分拆。嘩！班家長梗係開心啦，睇怕陳維安都覺得呢個係佢任內嘅一大政績，但班書商就即時O晒嘴。

咪以為陳維安真係咁把炮，原來搞出個大頭佛就真，仲惹起軒然大波。有份開會嘅書商話根本冇達成共識，仲鬧爆政府刪改咗會議紀錄，因為佢哋喺會上提出，政府必須答應提供資源畀學校購買教材呢個大前提至有得傾，但呢個大前提嗰部分嘅紀錄完全冇咗。

書商嘈到拆天，但陳維安就匿埋冇出嚟解畫，跟住靜雞雞跪低，加番書商所講大前提嗰部分落會議紀錄，事後亦冇回應係咪答應書商嘅要求。唔通又係政府用開嗰招：唔提就唔存在？

當然唔係，兩大書商尋日喺網上公布喺九月嘅新學年唔會分拆，仲反加價添，即係家長嚟緊要捱更貴嘅書。

嗱！大家睇到啦，陳維安做電子書又死，做分拆課本同教材又死，咁點對得住班家長呀，根本係冇做好份工！

班立法會議員早早就話要炒晒班副局政助，但政府偏偏攬住呢班負資產，拆彈不成，仲炸到政府飛起，再係咁落去，佢哋遲早攬住一齊死。