短打長擊：抹吓眼鏡睇真啲

天文台台長李本瀅澄清並沒有隱瞞核輻射塵攻港，表示由於未能百分百確定是輻射物，所以要抹吓眼鏡睇真啲，待進行覆檢證實數據才可公布，並沒有延遲對外公布，而且是「負責任」的做法！

明明上周六在尖沙咀抽取的空氣樣本中，首次發現含有微量來自日本福島核電站的人工放射性核素碘131，延遲最少一日才正式對外公布，卻辯稱「取樣、測量以及分析需時」，要抹吓眼鏡睇真啲。抹吓睇吓，睇吓抹吓，容乜易一日又過去，容乜易又到退休咬長糧！

大佬呀！你抹吓眼鏡睇真啲，說不定空氣中嘅輻射物突然猛增，你又要再抹吓眼鏡睇真啲，市民恐怕已經中晒招！

有個「意想不到」的笑話，不妨與即將退休的李本瀅分享：和尚跟屠夫是好友，和尚早上要起來唸經，而屠夫要起來殺豬。為了不耽誤各自工作，他們約定早上互相叫對方起來。多年後，屠夫去了天堂，和尚卻下了地獄。何以會如此？原來屠夫天天叫和尚起來唸經，是在做善事；相反，和尚卻天天叫屠夫起來殺生。

李台長要覆檢才肯通知市民，要抹吓眼鏡睇真啲才向大家公布「香港的環境輻射一直維持在正常水平」，是為了不想令市民恐慌，咁負責任嘅表現，將來自然會上天堂！

咦！咁即係話李台長係屠夫？非也！等我抹吓眼鏡睇真啲，再覆檢剛才的思路，哎唷！搞錯了！以李台長咁負責任嘅性格品德，佢應該係和尚！「我不入地獄，誰入地獄？」有如此情懷，李台長退休在即，實是香港人的損失！