油魔肆虐無王管 港府縱容民生苦

香江沉淪，群魔亂舞，其中張牙舞爪折騰百姓者，油魔也。長年飽受貴油價煎熬嘅運輸業，再度發起抗擊油魔行動，抗議油公司「加快減慢」，誓同油魔不共戴天。叮！運輸業今次起壇驅魔，矛頭直指油商，但計太一叮話齋，其他牛鬼蛇神一樣唔可以放過，佢哋係邊個？咪就係嗰班一直縱容油魔肆虐嘅高官囉。

油價加快減慢，運輸業首當其衝，不如聽聽佢哋嘅苦水先啦。以車用柴油為例，國際原油○八年最高峰時每桶一百四十五美元，當時香港柴油零售價每公升為港幣十一蚊六毫。截至前日，原油價係每桶一百零四美元，但香港柴油零售價竟比○八年有過之而無不及，仲賣貴兩毫子，難怪運輸業直斥油價脫韁，已經到達瘋狂程度咯！

油魔作惡，搵食車司機肉隨砧板上，任人宰割。運輸業忍無可忍大反擊，怒批有人合謀操控油價，宣布展開連串激烈抗爭行動，包括組成二百部車嘅車隊包圍油庫，以及杯葛某油公司等，一場人「魔」大戰一觸即發。

其實，油價加快減慢嘅問題已困擾香港多年，成因極大程度由於油公司之間形成一個牢不可破嘅「壟斷」局面，油價同上同落，步調一致，市場缺乏競爭所致。正如不少學者指出，呢種荒謬情況，就算唔叫合謀定價，都係早有默契啦，早應受到管制。但令人難以接受嘅係，運輸業年年抗議，政府次次束手，一直以「自由市場」為擋箭牌，坐視不理，話唔係鬼迷心竅都無人信。

須知道，油價高企，所造成嘅連環加價骨牌效應對民生衝擊極大，搵食車主叫苦連天，羊毛出自羊身上，最終搭客同樣遭殃。最慘嘅係，公共交通加價，勢令通脹火上加油，而油價又借勢加價，形成惡性循環，運輸業同升斗市民一同墜入呢個六道輪迴中，真係苦海無涯！

運輸業批評港府縱容油公司加價，計太一叮話齋，港府無能，直情係油魔肆虐嘅禍源啦。回歸之後，港府對油價問題一直袖手旁觀，本來社會寄望審議中嘅競爭法可制衡油公司，但當局立例又搞出滿天神佛，千瘡百孔，備受非議，條例能否趕及明年立法會會期結束前三讀通過實施，仍屬未知之數。如此無道嘅政府、如此無能嘅高官，油魔點會唔橫行無忌吖？

話時話，運輸業車隊包圍油庫，可唔可以迫使油公司減價仲係未知之數，太一叮只知道，港府高官唔叮唔做嘢。