SUN世代：水產王子接棒轉戰岸上

身為「富二代」，一出生就已佔盡優勢，站在較前的起跑線上，但要邁向成功終點，還要靠自己努力。現為華寶實業集團董事的李世傑（Eric），父親是水產大王，背景條件優厚，但他卻無坐享其成。擁有建築師專業資格的他，無懼艱苦由低做起，累積經驗後更肩負起改革重任，為家族生意開拓新領域，「父母好辛苦為我創下穩固基礎，我要加倍努力，帶領家業做到最好！」

家族從事水產生意，但Eric兒時對海鮮生蠔等沒有太大興趣，反而有另一夢想，「細細個已經好鍾意砌高樓大廈，又對建築物好好奇、好留意，想知一幢樓係點設計、點樣興建，好想大個可以做建築師！」長大後，他跟隨自己興趣，考入美國名牌大學攻讀建築系學士，畢業後留在當地進修建築及發展系兩個碩士學位。取得專業資格後，更在加州及紐約擔任了約八年建築師，一圓兒時夢想。　

盡孝道放棄建築師事業

而事業的轉捩點，在二○○八年出現，Eric憶述：「當時我不經意咁問爸爸：『如果我返嚟幫手好唔好？』點知爸爸反應好大，成個表情變晒，好開心咁話：『梗係好啦！』」眼見面前笑逐顏開的父親，如此渴望他繼承家業，於是他決定放棄建築師事業，回港當孝順仔，擔任家族生意的接班人。

Eric這位太子爺拒絕空降公司，反而由低做起，「最初返去冇title（職銜）㗎，係打雜一名，喺唔同部門學嘢。」他亦不怕辛苦，經常親自到濕滑腥臭的批發市場與魚販傾生意，又遠赴不同國家的養殖場視察，了解不同種類的水產。為何這名富家子弟會如此捱得？答案可追溯至二十多年前。

原來Eric八歲時獨自負笈新西蘭，寄宿學校要求非常嚴格，例如規定學生每天清晨五時半必須到室外泳池游泳，連下雨天甚至冬季也不例外。這段難忘經歷，令Eric在磨練中成長，「我係學校唯一嘅中國人，嗰時英文又唔係特別叻，覺得所有嘢都要從頭開始，好無助！但最後都靠自己慢慢適應同克服，鍛煉到我比較獨立同捱得。」

創新天尋找新投資目標

現時擔任家族生意掌舵人的Eric認為，家業傳到下一代，不能被動地守業，而要積極地轉業，於是他為公司加入新元素，開拓健康熟食市場，主要為學校提供飯盒，為學生打造健康午餐—由外國進口新鮮肉類，餸菜以低脂為原則，配以糙米飯，結果大受歡迎。Eric未有自滿而停下腳步，並不斷尋找新投資目標，誓帶領家業邁向多元化發展。

別以為Eric打理家族生意會「好歎」，工作量反而比以前更多！他笑言：「以前幫人打工，可以準時放工，OT又有錢補，但自己做老闆就要無時無刻睇住盤生意！我已經兩年冇放過假喇！」雖然工作辛苦，但他亦慶幸自己是幸運的「第二代」：「父母好辛苦咁打好咗個穩固地基，等我可以自由去起樓，畀我好大發展空間。所以更加要努力，希望帶領屋企生意做到最好！」

Eric's Profile

婚姻狀況：未婚

學　　歷：密芝根大學建築系碩士、哥倫比亞大學地產發展系碩士

公　　職：香港中華廠商聯合會會董、香港青年聯會會董、香港西區少年警訊名譽會長、江門市政協委員、江門市青年聯合會委員、江門外商投資企業協會副會長、湖南省青年聯合會委員

專業資格：美國註冊建築師、美國建築師學會會員

興　　趣：高爾夫球、滑雪、水上活動