政情：搞搞政：阿人長毛戥腳關心利比亞

日本大地震吸引住全城眼球，而糾纏咗一排嘅利比亞內戰，仲有幾多人關心呢？職工盟李卓人同社民連「長毛」梁國雄不約而同話關注，表示好關心及後聯合國可能制裁利比亞，所以齊齊加入立法會聯合國制裁事宜小組喎！

多兩個人易開得成會

聯合國依家只喺利比亞實施禁飛區，仲未敲定具體嘅制裁行動，相信大家都覺得阿人同長毛突然伸個頭出嚟話關注嘅理由好奇怪。翻查小組成員名單，發現開始時只有四人，包括公文袋兩名議員、建仔劉江華同公民起動何秀蘭，之但係公文袋嘅陳淑莊年初突然退出小組，搞到得番三個人，僅符合開會嘅法定人數，少一個都開唔成會，都咪話唔煩。

有委員爆料，話身兼行會成員嘅劉江華太忙，搞到會期經常一改再改，冇辦法之下惟有拖阿人同長毛落水，希望可以易啲夾時間開會。不過，小組只係負責審議聯合國制裁決議案嘅附屬法例，通常冇乜爭議，加上制裁問題十畫未有一撇，相信就算阿人同長毛落水都唔需要成日開會。