政情:議員撐日食擇豬牛而噬

尋日都講過,食物及衞生局局長周一鑊同下屬以公務為由,拒絕跟班立法會議員去撐日本菜,以為佢哋攝高枕頭諗咗一晚會回心轉意啦,點知都係全部唔見影。

立法會飲食界議員「肥仔張」張宇人尋日率領十一個同僚去位於灣仔嘅某日本料理食晏。聲言一個禮拜至少食兩次日本菜嘅陳淑莊,自從大地震發生後已兩個禮拜冇食過,但佢聲言唔係怕咗輻射,仲話:「我內心好大掙扎,又想去食日本嘢支持佢哋,但又好似同佢哋爭食咁!」出名識飲識食嘅黃定光就未驚過,鯨吞壽司後聲言「乜嘢都唔怕,最怕冇得食」;詹培忠就揚言「你敢賣,我敢食」,為本港嘅食物安全同日本食肆大打強心針。

話雖如此,唔知點解班議員落柯打時,都傾向嗌豬扒飯同牛肉飯等菜式,可能對魚生點都有啲心存顧忌。

「Money18免費即秒股票報價網站」現推出8升級功能,財經資訊,實時實發!

肥仔張(左二)尋日帶十一個同僚去灣仔某日本料理食晏。