政情：嫻姐靜思叫棠哥咪逼佢
工聯會一直希望能夠說服到「票后」陳婉嫻出戰立法會超級區議會議席，連會長鄭耀棠都講到明，只要嫻姐講聲「我願意」，就會用八人大轎抬佢上位。之不過，嫻姐就唔多領情，尋日喺大氣電波仲叫棠哥講少兩句，等佢靜多幾個月好好思考吓，唔好逼迫得佢咁緊要喎！
不過，嫻姐都承認最近多咗人游說佢出山，搞到佢唔再斬釘截鐵咁話唔再選。佢認為做立法會議員成日開會好困身，但大權在手，做嘢自然有效率得多。
點知轉頭佢又話自己可能「多心咗」，充分表現佢有幾三心兩意。咁幾時會扑錘呢？佢就神神秘秘咁話要再思考吓，相信八、九月一定確定到人選喎。