政情：焗撐鬍鬚曾玩殘建制派

財爺鬍鬚曾發表史上最廢嘅預算案惹起天怒人怨，泛民主派早前更醞釀向佢提不信任動議，可惜建制派群起保皇，未能抽中喺預算案表決前提出。

立法會尋日辯論由建仔議員提出有關國家十二五規劃嘅動議，白鴿黨黃成智就寸爆建仔提動議提得好合時，事關可成功堵截泛民譴責鬍鬚曾。眼見畀人踩到上心口，建仔主席譚耀宗罕有咁強硬反擊，怒轟曾揶揄建制派「密會」鬍鬚曾有如搞一夜情嘅黃成智「張冠李戴」、「玷污議事堂嘅空氣」，仲話若對方喜歡「呢啲玩意」，佢都冇辦法阻止喎。

查實建仔為咗幫鬍鬚曾補鑊，連日嚟確係花咗唔少工夫，難怪譚Sir咁燥底。據了解，就連中聯辦喺近兩個禮拜先後約見建制各黨派，向佢哋發出「溫馨提示」。

飯局有火藥味

有建制派透露，中聯辦喺會面中同佢哋講，既然鬍鬚曾已讓步派錢，佢哋要抽嘅水已抽完，鬧亦鬧完，希望佢哋可以「高抬貴手」，除咗全力支持預算案外，喺嚟緊嘅預算案辯論發言時亦要畀畀面，唔好再插佢，免得令已經瘀爆嘅佢更難堪。經歷臨時撥款被否決一役後，中聯辦更再三叮囑建制派唔好掉以輕心，要坐定定等投票，費事再畀泛民「突襲」成功，為特區政府添煩添亂。老實講，鬍鬚曾闖禍後，各方都畀佢玩殘，仲要幫佢保住烏紗，係佢添煩添亂至真。

雖然建制派要齊心撐鬍鬚曾，但尋晚建制派照例開飯，仲約埋署理特首唐唐出席。有與會者透露，飲食界議員張宇人大鬧政府喺最低工資立法前睇漏眼，先會衍生扣飯鐘錢同冇薪休息日嘅問題，但佢又幫僱主開脫，話唔可以怪僱主無良，在商言商都係好自然嘅事。

講到一半，勞聯嘅李鳳英就忍唔住打斷佢，直斥有僱主賣廣告教人扣飯鐘錢係「撩交嗌」，工聯會嘅葉偉明亦幫埋口，情況差啲一發不可收拾，唐唐見狀即刻做和事老。