財爺食飯大過天　派錢細節得個吉

古語云：「王者以民為天，而民以食為天。」特區高官啱啱相反，自己食飯大過天，市民有冇飽飯食？話之你啦！呢，財爺曾俊華就係人辦中嘅人辦嘞。

立法會財委會尋日召開特別會議，討論預算案嘅派錢措施，鬍鬚曾被召解畫。大家都知啦，派錢方案至今「零細節」，點派法？幾時派？一次過定分期攞？一切懸而未決，議員提問連珠炮發，兩個鐘頭嘅會議梗係唔夠喉啦，於是，會議結束前十五分鐘，主席劉慧卿按慣例問鬍鬚曾能否留耐啲，畀議員問到清楚為止。

你估鬍鬚曾點答呢？佢話：「主席，我仲有其他嘢做，我仲未食飯。」叮！真係豈有此理。有人話，官字兩個口，上口奉承，下口吃錢，原來特區嘅飯桶官員，上口食飯，下口都係食飯。既然食飯咁緊要咯喎，民生福祉、政策事務梗係統統掃埋一旁，容後再議啦！

散會後鬍鬚曾去咗邊間大酒店鋸扒飲紅酒，不得而知，但一定唔係同升斗市民逼茶餐廳、食粟米斑塊飯，事關佢講過，自己唔鍾意食粟米，亦唔鍾意食斑塊。不過，佢知唔知道，幾多基層市民生活捉襟見肘，平日醫肚連叫碟粟米斑塊飯都要計過度過？佢又知唔知道，派錢六千蚊，對佢嚟講可有可無，但對好多貧窮家庭就係能解燃眉之急嘅及時雨？望穿秋水等政府早日公布細節、盡快派錢嘅市民，聽到鬍鬚曾呢句「未食飯」，真係隨時激到連飯都食唔落。

結果呢，鬍鬚曾只係留多十分鐘咁大把，有冇誠意，有冇承擔，市民自有判斷。當然啦，議員對派錢細節窮追猛打，最終梗係問嚟問去得個吉啦，好似派錢有乜手續、十八歲定義條界點劃，呢啲市民最關心嘅問題，鬍鬚曾同班官員一句都答唔到，只識舊調重彈話考慮透過銀行戶口過數。全程最清晰嘅答案，係講明四月十三號預算案表決前，派錢措施都無可能落實，你話係咪令人噴飯吖！

其實，港府嘅派錢措施，市民至今疑問多多，鬍鬚曾絕對有責任向議員詳細解釋。尤其佢最近公布注資十五億元入關愛基金，向新移民「補派」六千蚊，但就設下嚴苛嘅入息審查門檻，被炮轟搞「分化再分化」。鬍鬚曾唔識把握機會解畫，反而一味掛住食飯，智慧欠奉，承擔全無。有政黨計劃對鬍鬚曾提不信任動議，計太一叮話齋，不如直接提個「鬍鬚曾落台返歸食飯」議案啦，肯定好多人舉腳贊成呀。叮！