政情：搞搞政：局長鬥抖氣排隊快閃

立法會一連幾日舉行特別財委會，一眾高官都畀史前最廢嘅預算案所累，人人都畀議員鬧到狗血淋頭，唔知係咪咁，一捱到個會完結，啲政策局長就急急腳攞假抖氣。尋日憲報就披露，環境局局長邱騰華最快手，今個禮拜一下晝已經行開兩日半，嚟緊仲有幾個官接力，呢兩個禮拜，政府好似進入替身管治期咁。

副局長好唔得閒

每年預算案公布後，財委會都會舉行多日會議，由各個政策局局長去解畫。今個禮拜一上晝，邱騰華打頭炮，雖然首日會議好多重點都去咗講核電站安全，但佢都畀議員鬧到飛起，呢頭開完會，邱騰華即日下晝就急急腳放兩日半假；跟住嚟嘅仲有政制及內地事務局局長林瑞麟，佢喺特別財委會完成後三日放假；運輸及房屋局局長鄭汝樺亦定咗三十一號到下個月四號放五日假。

佢哋不約而同放假，再加上商務及經濟發展局局長劉吳惠蘭病咗，假期延長約三個禮拜，政府三司十二局裏面，就有四個局由副手署任。如果再加上喺核危機事件中日日亮相嘅保安局黎棟國同食衞局梁卓偉，班副局長好唔得閒噃。