政情：大輝風騷叨郭灝霆光
香港單車手郭灝霆前日喺荷蘭贏咗世界場地單車錦標賽，身為香港人都與有榮焉，而立法會廠商會代表林大輝就特別高興，事關灝霆係林大輝中學嘅出品，難怪大輝尋日喺立法會開心到爆，猛咁硬銷自己間學校。
立法會財務委員會尋日嘅特別會議，有一節係審議民政事務局來年開支預算。身兼香港體育學院董事嘅大輝心花怒放咁話，前日香港體壇有一件「令人好興奮、鼓舞同埋驕傲嘅喜事：即係我林大輝中學嘅學生郭灝霆，亦都係體院精英運動員，尋日真係為港爭光」。
會上眾人聽到即時大笑，抽咗一次水嘅大輝睇嚟意猶未盡，繼續笑咪咪咁形容呢個喜訊除咗係灝霆個人同港人嘅成就之外，「當然亦都係我哋林大輝中學嘅部分成就」，抽水工夫認真到家！