政情：鬍鬚曾諮詢爛騷嘥錢

史上最廢嘅預算案公布之後，政界、學界同市民都連番炮轟政府嘅諮詢零作用，財爺鬍鬚曾每年都使成幾十萬至近百萬元搞諮詢大騷，結果卻同倒錢落鹹水海冇分別。尋日佢去立法會解畫，已經畀立法會議員炮轟，富貴黨副主席方剛嚟緊禮拜三都會出招，提書面質詢要鬍鬚曾解釋今年諮詢使咗幾多錢？有乜用？誓要拆穿佢年年炮製諮詢爛騷嘅假面具。

高高在上難察民情

其實今次已經唔係方剛第一次就類似問題向鬍鬚曾開火，身為立法會批發及零售界議員嘅佢，早兩年已經叫過鬍鬚曾唔好再浪費公帑搞假諮詢同個人宣傳，不過鬍鬚曾明顯當耳邊風，方剛氣上心頭，直言鬍鬚曾既然唔會考慮諮詢嘅意見，不如唔好繼續勞民傷財，諗吓取消公眾諮詢啦！

事實上政府嘅所謂諮詢，如高官落區搞吓座談會、見吓政黨、同學者傾吓，佢哋以為咁就可以收晒四方八面嘅風，冇諗過管治者高高在上嘅心態每每令政策唔貼合民情。政府○九年曾經答過立法會，揭露預算案嘅爛騷所費不菲，譬如當年製作漫畫書用咗三十三萬元，製成電視短片同播放廣告就用咗四十萬元，再加埋其他開支，淨係製作同廣告費都用咗七十四萬元，至於鬍鬚曾落區、用社區會堂，搞到公務員、警員全部跟頭跟尾嗰啲數，就好難計嘞。

勞民傷財又冇效，香港人條氣點會順呢？只要睇今年嘅預算案全城喊打，市民不滿比率創晒紀錄，鬍鬚曾真係有必要解釋吓佢諮詢時聽咗啲乜意見。據悉，方剛其實對呢份預算案真係好反感，一早就認為要否決咗佢，不過富貴黨喺鬍鬚曾決定派錢之後，好有機會會投票支持，身為富貴黨副主席，方剛梗係要緊跟黨嘅立場啦，不過對預算案嘅無奈同諮詢騷嘅不滿就吞唔落，惟有提質詢要鬍鬚曾反省。