短打長擊：噴泉之都 漏水之城

內地古城濟南大明湖有「四面荷花三面柳，一城山色半城湖」之譽，而香港這個示威的動感之都則有「四條水管三條爆，一城噴泉半城河」之稱，你都咪話唔盞鬼。

總之，日日爆水管，市民日日有噴泉欣賞。講真，遲吓夏天到來，酷熱天氣警告下，市民大可着泳衣外出戲水，而街道成澤國，細路哥可以扒吓橡皮艇，好過去泳池，起碼不需與內地的同胞逼餐死，又不必擔心去到都入唔到。就地取材，不亦樂乎？

真係唔係講笑，水務署提供的數字顯示，由○八年至一○年，全港共有一千六百三十宗食水管爆裂個案，其中去年有三百七十一宗，平均每日一宗。活在香港，除了夜賞「幻彩詠香江」，更可日觀「噴泉出地底」，遇上陽光燦爛的日子，當你駕車經過，說不定水柱折射陽光成彩虹，見到「東區歡迎你」嘅區牌，你能不感激水務署遲遲更換唔切啲老化嘅水管嗎？

早前跑馬地爆裂的水管，原訂於一二年中復修。不過，更換及修復工程推行了十一年，至今進度僅達一半，仍有約一千八百公里長的食水管壽命逾三十年未被更換。市民如果夠「務實」，便應儲定蒸餾水，以備不時之需。

每次爆水管，居民無不叫苦連天。尤其是銅鑼灣一帶，食肆林立，一旦停水，影響食肆做生意。係人都知呢個黃金地段舖租幾貴，冇水影響做生意，真係一日都嫌長！見到商戶員工手執水桶飛奔撲水，水務署高官有冇浮起「務實的態度和對人民負責的立場」？