前景黑過墨斗 精英走夾唔抖

港府施政瓣瓣唔掂，天怒人怨隨時爆大鑊。走得快好世界，香港起錨無望，有條件有能力嘅，與其留喺度等船沉，不如用腳投票Say No，移民番邦。

有國際顧問公司話，金融海嘯之後本港移民數字增加咗二至三成，大部分係技術或投資移民。走嘅主要係高學歷精英，多數因為對政治環境同教育制度不滿。中產付出多，但就得唔到合理回報，加上政治爭拗不斷，三十六計，走為上計。

估唔到回歸未夠十四年，香港又出現移民潮。同上次唔同，精英要走唔係怕九七大限，唔係因為解放軍殺到，亦同共產黨無關，而係因為港府施政亂過亂世佳人，令到民怨滔天，為下一代着想惟有背井離鄉，去外國做「二等公民」。

好似招先生咁，九七年全家移民新西蘭，後來回流，一年幾前又全家申請移民加拿大。返番嚟又話要走，為乜？佢話今次移民完全係為子女。本港教育朝令夕改，加上經濟過於傾斜金融、地產，後生根本睇唔到出路。

佢狠批港府政策缺乏前瞻性，壓抑樓價方面尤其短視。四百萬喺東九龍只夠買個七百呎嘅單位，喺外國可以買大五倍嘅屋。香港同人哋嘅生活質素差天共地，點安居樂業吖？

叮！最諷刺嘅係，除咗移民番邦，北上神州搵食已經係新趨勢。有移民顧問公司負責人話，近年多咗人返內地發展，而且比例相當高。好多九七前移居海外嘅人，回流後轉到內地發展，當中唔少係會計師、工程師及科技人才。

人離鄉賤，呢班精英唔係「犯賤」，而係對港府完全死心。哀莫大於心死，惟有遠走他鄉冇眼睇。有民調發現，教育程度愈高嘅市民，對官員嘅評分愈低，反映中產對當局已經失去信心。學者更直斥港府喺住房、醫療同教育方面，將中產「逼埋牆角」。

中產「付出多、福利少」，用佢哋自己嘅講法，名副其實「中慘」階層，但港府一於少理。呢，今次預算案風波之所以令民怨爆發，最主要原因就係漠視中產退稅嘅訴求，呢啲咪叫自嘗苦果囉。

城市大學專業進修學院學術統籌宋立功就講得啱嘞，港府知識型經濟發展唔起嚟，六大優勢產業又冇料到，中產失望就會去外地搵發展機會，精英離開對香港社會發展影響好大。

政府施政冇願景冇方向，前景黑過墨斗，精英梗係走夾唔抖啦。計太一叮話齋，人才留唔住等於傷口流血不止，再係咁落去，香港遲早「失血」玩完。叮！