SUN世代：膠品千金唱紅A計劃

「可能大家無留意，機場廁所個垃圾桶都係紅A產品。其實咁多年嚟，我哋公司都無停止過發展，但係有冇人知？」眼見盛極一時的家族公司，近年恍似突然銷聲匿迹，梁馨蘭（Jessica）去年重返紅A後，拒絕繼續沉默。她說：「我哋唔係想高調，但如果成日收埋自己，下一代點樣認識紅A呢個品牌呢？」

星光實業專門生產紅A塑膠產品，已成為香港人集體回憶的一部分。水桶、膠櫈、漱口盅、筲箕、垃圾桶，早於五、六十年代飛入尋常百姓家。不過，對新一代年輕人來說，這個經典品牌似乎逐漸褪色。箇中原因，可能是上一代的作風低調，較少做宣傳。大學主修國際商業、工商管理碩士專修市場學的Jessica，現時為公司的業務拓展總監，正好可以發揮所長，開展她的「品牌重整」大計。

搞完網購 玩埋復刻

「雖然全球家品市場正萎縮，不過紅A係靠家庭用品起家，我哋希望新一代自己去認識呢個品牌，開拓新市場。」最近，公司找來人稱「幟哥」的飲食界名人黃永幟，擔任品牌「代言人」，早前亦開設網上購物網站www.reda.com.hk，目的都是希望吸引外界注意：「反應都算OK，不過未到最好，嚟緊會諗啲新橋，大事宣傳！」

即將推出的「復刻版」仿水晶燈，以及「high-end少少嘅」漏斗形膠櫈，是Jessica的另一新猷，將經典產品注入新元素，再重新推出市場，恍如經典再生：「水晶燈限量生產一百盞，純粹係為咗宣傳，數量咁少，賺唔到錢。」至於另一重頭戲的膠櫈，暫定會推出四種顏色，其中紅色更是限量版，不過她承諾價錢依然相宜：「售價都係幾十蚊左右，大家一定負擔得起！」

周圍閒逛 吸收靈感

Jessica計仔多多，正構思與志願團體合作，發起公司員工組織義工隊，逢周末探訪長者、低收入家庭等弱勢社群：「順便帶啲公司產品畀佢哋，藉此提升公司形象。」留一頭短髮的Jessica，性格亦見爽朗，說話從不轉彎抹角：「其實父母以前都有咁做，只係比較低調。星光實業今年已踏入第六十二年，陪伴香港咁多年，應該做番啲嘢，回饋社會。」

市場推廣工作的辛苦之處，「就係要諗計仔、諗方法，仲要老細buy！」Jessica中五畢業後轉到美國留學，在外地生活多年，處事帶有幾分「鬼妹仔」性格：「如果個腦諗唔到嘢，我會同同事講，『坐低飲杯嘢先！如果靈魂唔喺度，坐喺度幾耐都無用。』」她平時也會到其他家品店閒逛：「或者去書店睇書，約朋友傾吓偈，了解各行各業嘅現況，周圍吸收靈感。」

梁馨蘭小檔案 Jessica

現職：星光實業業務拓展總監

學歷：國際商業學士、工商管理碩士（市場學）

婚姻狀況：未婚