香港乳癌基金會前日搞咗個名為「暗香疏影」嘅籌款攝影展，展出「腎科教父」余宇康嘅作品，撐場嘅除咗中大校長沈祖堯同行政會議成員梁智鴻外，仲有近期又再活躍金融市場嘅中信泰富前主席榮智健。
榮智健早幾日先宣布成為新股「海隆」嘅基礎投資者，認購足足七千八百萬元，前日又以捐款人身份出席余宇康攝影展。佢捐咗幾多錢？大會話因為捐款人想低調，所以唔方便透露捐款額喎，唯一可以確認係佢可以獲贈余宇康嘅攝影作品。
榮智健（左一）出席乳癌基金會為余宇康（右二）舉行嘅籌款攝影展。
