政情：搞搞政：支出增收入減 立會錄赤字

政府庫房水浸玩慳家，但不嬲慳家嘅立法會反而使大咗。立法會行政管理委員會尋日發表上年度工作及財務報告，赫然發現罕有出現七百幾萬元赤字，換句話即係立法會上年嘅財政見「紅」。

搬新大樓多聘保安

行管會份財務報告顯示，支出增幅最大係職員薪酬，比起○八至○九年度大增一千三百萬元，一般開支亦大增六百萬元。據了解，職員薪酬之所以大幅增加，除咗因為加人工外，更重要係舊年開始增聘咗唔少人手，當中尤以保安員嘅增幅最為明顯。眾所周知，立法會嚟緊會搬入新大樓，到時地方大咗又靚咗，保安人手自然要增加。

專業服務開支增加，據聞最主要用喺外判法律服務方面，雖然立法會設有法律部，但當立法會遇到一啲極大爭議、或同政府法律意見相悖嘅情況時，立法會好多時都會向外諮詢法律意見，近年行政立法關係咁差，呢方面開支增加亦係意料之內。

再加上議員酬金同醫療津貼、議員工作開支償還款額等都全面增加，夾埋增加咗一千一百萬元，最弊嘅係立法會嘅投資收入減少，自然入不敷支。