賭王何鴻燊爭產風波拉鋸逾兩個月，四太梁安琪一直細心侍候賭王，但幾忙都好，善事照做。保良局尋日舉行會員周年大會，選出新一屆董事局成員，四太由總理「升呢」做第四副主席。
第一副主席龐盧淑燕就坐正做主席，龐太當正保良係佢第二個家，今屆索性拉埋靚新抱龐董晶怡加入保良擔任總理，今次婆媳雙劍合璧，必定為保良帶嚟一番新景象。
講番何家，除四太公職身份有變外，賭王千金何超蕸都唔輸蝕，早前當選新一屆東華三院副主席，而三太陳婉珍就做緊東華副主席。