政情：青聯招聘會送CEO飯局

香港青年聯會搞第三屆招聘日，將喺呢個月十九號接受申請，仲搞搞新意思，鼓勵有意見工嘅大專生透過網上登記，除咗有機會抽中潮物iPad平板電腦外，有十位幸運兒更可參加「與CEO同枱共進午餐」，有助擴闊視野同膽量。邊位CEO？咪係身兼香港及全國青聯副主席嘅新世界集團主席鄭裕彤長孫鄭志剛囉！

香港青聯主席陳仲尼分享見工經驗，話當年讀完大學應徵過花旗銀行，經歷五輪面試至成功。後來佢重返校園修讀碩士，修畢後再應徵三間國際投資銀行，令佢印象最深刻係要經過五至六輪面試，其中一次更要飛去美國紐約總部，同老闆單獨喺一間大房內共進午餐，真係見少啲世面都唔掂。

青聯司庫兼招工日召集人彭芷君話，今年提供嘅職位空缺達一千七百幾個，比舊年多一半有多，共有八十幾間上市公司提供職位，平均工資更由去年嘅九千五百元增至一萬二千三百元，反映市道相當好。佢提醒有意應徵嘅大專生，當日記得着正裝去見工，事關佢哋會即場面試喎！