社會共識一早有 復建居屋不容緩

「有些人天生賤骨頭，你把刀不架在他脖子上，休想他聽話！」新派武俠小說《無憂公主》中，俠士綠衣人咁樣怒斥歹徒。其實，用呢句話嚟形容財政司司長曾俊華，仲更加合適。

講真，鬍鬚曾呢條友真係天生欠打。嗱，要派糖抗通脹，將啲錢一五一十派街坊咪得囉，佢偏偏要玩嘢，話將啲錢注入強積金戶口喎，市民Ｎ年後先至到手，等同望梅止渴，點會唔辣慶！

全港市民齊齊聲討史上最廢預算案，鬍鬚曾惟有拿拿臨補鑊，改為派錢每人六千蚊。可惜太遲喇，成萬人上街要佢落台，去鵝頸橋打佢小人嘅市民排晒長龍。

鬍鬚曾咁至識驚，暫時放低官架子，一味揀市民鍾意聽嘅話講。佢話過去一周嘅經驗好寶貴，仲話已留意到社會上有其他訴求，包括復建居屋、設立全民退休保障等，政府一直處理當中咁話。

話時話，都算佢未懵得晒，仲諗得起復建居屋問題。其實，置業難呢個計時炸彈仲勁過派糖問題，一旦爆炸，香港分分鐘變死港。家陣樓價高企，美國一間顧問公司調查顯示，本港住宅樓全球最貴，樓價中位數相當於家庭年收入逾十一倍。普羅市民望樓興嘆，各界一早就要求復建居屋，立法會仲通過咗相關動議。但係政府一於企硬，直到上月底鬍鬚曾仲實牙實齒話政府唔會復建居屋。

鬍鬚曾話喎，行政長官已經有更好嘅計劃畀市民先租後買，所以冇必要復建居屋咁話。佢所講嘅更好計劃叫做「置安心」，就係由政府起一批單位租畀合資格市民先住幾年然後再買，部分租金就會用嚟做首期。

唔提「置安心」仲冇咁嬲，一提就把幾火。呢個計劃查實係呃神騙鬼，嗱，一共只起五千個單位，但輪候人數至少有十幾萬，仲難過中六合彩。咪以為抽中就有機會「安心」置業，首批只有一千個單位，而且最快要到二○一四年先入伙，等得嚟蚊都瞓，蛇都死啦。講到尾，所謂更好計劃只係畫餅充飢，名為「置安心」，其實係「至傷心」就真。難為班高官連咁爛嘅方案都攞得出手，咪當市民係羊牯先得㗎！叮！

鬍鬚曾畀人哋鬧咗一大餐，終於改口風話會考慮復建居屋。其實，復建居屋一早就係各界嘅共識，高官視民意如浮雲先至當冇其事之嘛。既然知道係市民嘅訴求，仲等乜嘢呀，快快趣趣做啦。唔通又要幾萬人上街，你哋先至肯郁咩！叮！