政情：李家仁唔畀學生睇貓紙
《小明上廣州》喺網上嘅點擊率爆晒燈，令主唱嘅家庭醫生李家仁成為網上紅人。李醫生尋日以主禮嘉賓身份出席香港教育學院第一屆教院青年節，表現出位，上台時不但搶咗學生主持手上嘅貓紙，叫學生放膽挑戰自己，更即席獻唱《小明上廣州》，以此形容自己嘅歌唱事業艱難，但全靠「唔怕蝕底」嘅精神，至可以開拓更多渠道去接觸同發展歌唱事業。
李醫生仲話好認同教院學生搞嘅「身無分文，探索社區」活動，因為自己曾經有呢個經歷，「以前食雲吞，原本兩毫子加咗一毫子價，試過冇錢畀」。佢鼓勵大學生勇於夢想，作多方面發展。
