政情：建制派掃樓唔信鬍鬚曾
被嘲為「史上最廢」嘅預算案激起滔天民怨，其中一個敗筆就係被政黨狠批冇重藥壓抑樓價。以鬍鬚曾嘅斑斑劣績，邊有議員真心相信佢可以壓抑樓價吖？睇吓專業會議「鼠王芬」梁美芬同保險界陳健波雙雙入市就知啦，一係睇穿預算案唔會再對樓市落重藥，一係睇死鬍鬚曾出招都唔慌有料到。
鼠王芬喺今年一月再度出手，透過公司名義掃入一個物業，今次睇好高鐵香港段總站所在嘅九龍西，令手頭嘅物業版圖回復至高峰期嘅六個。至於家住南區豪宅貝沙灣嘅陳健波，一月份購入海怡半島高層兩伙相連單位，打算先放租後自用。佢強調唔係炒家，新單位作長遠投資用途，日後留畀家人自住，因為難得搵到向海、向南兼位處高層嘅相連單位，所謂千金難買心頭好，於是扑錘買入。