政情：搞搞政：IT豪輸官司冇蝕入肉

都話啦！打官司就好似燒銀紙咁，好似立法會資訊科技界議員「IT豪」譚偉豪咁，○八年進身立法會後就同當時嘅選舉對手莫乃光打官司打到依家，早前仲畀終審法庭裁定敗訴兼要賠訟費，有關選舉呈請嘅官司仲有機會沒完沒了咁糾纏落去，分分鐘四年議員薪金都唔夠打官司。IT豪以前呻過律師費太貴好肉赤，計埋呢筆咪傷上加傷？非也，止蝕就真。

條數係咁計嘅，莫乃光上屆選舉後指IT豪違規賣廣告，隨即提出選舉呈請，但喺原訟庭先輸一仗，法庭判佢要畀埋IT豪嘅訟費，合共要成百幾萬。莫乃光唔服，上訴再上訴，喺終院反敗為勝，IT豪要掉番轉幫佢畀上訴庭同終院嘅訟費。但兩次上訴嘅聆訊時間計埋都唔夠原訟庭嗰次長，所以就算賠晒兩堂訟費，計埋條數都有賺。

IT豪話會尊重法庭判決，對要畀幾多訟費已經睇得好開，最後好大可能打個和，甚至慳番幾十萬元。