政情：長毛契女暴風眼中摺花
前晚警方出動胡椒噴霧鎮壓80後，連八歲小童都被殃及。呢單警民大衝突前六個鐘，社民連嘅成員想喺政府總部栽種茉莉花，最後遭警方以人鏈圍堵，兩方對峙，氣氛繃緊，但記者發現喺雙方沓雜慌亂嘅人腳之間，有一個樣子精靈嘅小女孩，坐喺政府總部紫檀樹旁地下玩摺紙，悠然自得，天真爛漫，同現場一觸即發嘅緊張氣氛形成強烈對比。
呢個小女孩對住咁激嘅示威場面，毫不怯場，究竟係邊家嘅囡囡？原來係社民連立法會議員「長毛」梁國雄嘅混血兒契女。呢個小女孩好似天生食呢行飯，血液流住擅搞遊行示威嘅基因咁，唔知仲以為係長毛親生女呀！
長毛話契女係由媽咪帶嚟遊行，因為趕住返屋企做功課，夜晚六點前離開政府總部，巧合避過入夜後中環街頭警民衝突一幕。
長毛契女喺沓雜嘅示威人群中摺紙花。