政情：諾基亞老總露宿送外賣

諾基亞香港及澳門區市場營運總經理Bruce林國誠喺舊年聖誕節，參加本港一個電台搞嘅真人騷，體驗露宿滋味。人生首次靠兩蚊度日，被置身於羅湖商業城，佢厚住面皮求車站職員幫忙，成功返港，但考驗至真正開始。

佢本身係銷售鬼才，口才了得轉數快，點知變身露宿者後，四出敲門，應徵二十份工都食白果。好唔容易搵到份送外賣，為賺百幾蚊，日做十幾粒鐘，行到襪都穿，返咗兩日工心力交瘁。

喺七度寒風下，佢以紙皮當被瑟縮球場一角，以為入住避寒中心會係天堂，誰知同失意嘅露宿者逼埋一齊都好難頂。五日四夜過去，佢學會更珍惜同感恩。

Money18 新功能「18好路數」為你預測心水股票升跌機會率。

七度寒風下，林國誠以紙皮當被瑟縮球場一角，身心俱疲。