政情：煲呔曾由社企怒海浮沉

早前都講過民協近年花咗唔少時間搞社企，奈何生意難做，唔少更蝕本收場。為爭取政府支持，該黨議員KK馮檢基尋日專誠請咗民政事務局副局長許曉暉去「民社中心」社企咖啡店「試菜」，仲搬出鎮店之寶「刻骨銘心」咖啡。本來名人效應係好嘅，但呢個政府衰到貼地，靠班官會唔會有反效果呀？

「刻骨銘心」係由兩杯Espresso、一杯奶同兩片杏仁餅組成，畀大家一次過嘗盡苦、甘、香、甜四種味道，KK笑言呢款咖啡有如「追女四部曲」。雖然許曉暉聲言「飲兩啖咖啡已瞓唔着」，但靚啡當前亦難以抗拒，破戒一試，飲完大讚既香且醇，勢要叫多啲同事嚟幫襯喎！商界出身嘅佢仲向KK獻計，建議咖啡店嘅招牌同員工制服由深紅色轉為青綠色，等佢哋可以更搶眼。

咖啡店開業八個月

雖然咖啡店口碑唔錯，但開業近八個月，至今仍未回本，每月更要蝕成幾萬蚊。其實，民協搞嘅社企清潔公司仲未止血，只有做三行有得賺，之前有基金佬話幫三行上市，若成功上市就可以分股份，人人可以做老闆，可惜最後因欠實力而告吹。

呢口烏氣不吐不快，KK同許曉暉摸住咖啡杯底時都忍唔住鬧煲呔曾政府，指社企喺老董年代引入，但煲呔曾上場後冇做過任何嘢，冇加入任何新意念，就連社企嘅相關諮詢委員會喺○九年成立至今都唔知做過乜。

又難怪KK咁火滾嘅，社企呢個概念係由梁錦松做財爺嘅時候提出，話要教人捉魚，等市民自力更生。到依家點呢？KK好明顯係鬧爆煲呔曾政府淨係識得因循，墨守成規，當啲社企係棄船咁，任由佢哋喺怒海中掙扎，亦唔理佢哋嘅死活。

KK仲批評預算案雖然撥出逾億元助社企發展，但卻一直冇長遠又整體嘅政策，希望政府唔好淨係識用錢塞住人把口，應加多幾分力度助社企發展喎！