全港第一新聞網站 東方互動誰與爭鋒

東方一出，誰與爭鋒。唔係太一叮賣花讚花香，東方報業集團又有威水嘢，除咗銷量第一，讀者人數第一，依家仲成為全港第一新聞網站添，點到你唔服！

乜嘢叫全港第一新聞網站？即係瀏覽人數最多咁解。根據國際互聯網市場研究公司comScore Media Metrix嘅報告，東方報業集團旗艦網站on.cc上個月單月不重複瀏覽人數達二百八十七萬，單月瀏覽頁次三億八千萬，以新聞網站嚟計，全港第一，冇花冇假！

正所謂有麝自然香，on.cc榮登王者寶座，愈嚟愈受歡迎，絕對係實至名歸。尤其係舊年七月加入中文名稱《東方互動》，服務全球華人，更加如虎添翼，無遠弗屆。呢，舊年八月菲律賓馬尼拉發生槍手挾持香港人質事件，牽動全球華人嘅心，on.cc二十四小時即時新聞無休止報道成件事嘅經過，創下三千萬單日瀏覽頁次紀錄，以及單月不重複人數二百八十七萬佳績，真係唔簡單。

仲有吖，舊年推出嘅iPhone可以閱讀《東方日報》及《太陽報》，而即時新聞及智能電話上嘅手機版m.on.cc，令讀者喺返工放工途中都可以緊貼時事，成為手機上網必然之選。至於剛推出嘅iPad程式，提供《東方》、《太陽》兩報及即時新聞，進一步領導新媒體廣告發展。以舊年世界盃為例，廣告商透過on.cc網站、手機版、iPhone軟件等方式，作為吸引新一代觀眾嘅主要途徑，成績斐然，效果奇佳。

講到on.cc，就唔能夠唔提《東方》及《太陽》兩報網頁。隨着網民電腦升級，兩報網頁亦不斷提升功能，新推出將新聞加入facebook、微博等社交網站功能，更切合新一代網民嘅閱讀習慣。特別係《太陽報》，新聞採用大圖設計，版面醒目，更加受到全球年輕網民歡迎。

on.cc另一主力係《money 18》，呢個港交所指定提供免費即時股票報價嘅財經網站，打破其他財經網站喺經濟低迷期瀏覽率低嘅宿命，曾創下單月不重複人數一百零七萬嘅驕人紀錄。新增功能除咗陰陽燭，仲全港首創《18好路數》，統計所有本港上市公司股價升跌幅度及頻率，預測翌日股價，廣受好評，成為金融界廣告客戶打入新媒體市場必選網站。

更加難得嘅係，on.cc除咗有圖文並茂嘅各類資訊，仲有電視睇。《ontv》舊年中以全新姿態出現，包括加入中文名稱《東方電視》，同時推出新設計，可以更容易分享到社交網站功能，大受網民歡迎。ontv創下單月不重複人數一百三十六萬嘅紀錄，你都咪話唔犀利！

總而言之，成功非僥倖，on.cc能夠獨佔鰲頭，成為全港第一新聞網站，絕對係努力得來嘅結果。求變求新，精益求精，係東方報業集團嘅一貫宗旨，多謝各位讀者及網民支持，我哋一定會繼續努力，百尺竿頭，更進一步！