政情：搞搞政：毓民反口拒交代退黨人數

幾日前喺集思會上高調退出社民連嘅創黨主席黃毓民同黨友「大舊」陳偉業，仲即場呼籲支持者退黨跟佢哋走。當日兩人都聲言會喺尋日嘅退黨記者會上，清楚交代退黨人數，但尋日竟然喺會上反口，指未收齊晒啲退黨表格，唔肯公開數字。咦，有蹊蹺喎！

毓民同大舊尋日喺會上宣讀退黨宣言，但對於未來嘅選舉部署、前黨友「長毛」梁國雄嘅去留，以至本身應承尋日公布嘅退黨數字，都封口唔提，面對記者較為尖銳嘅提問，更表現得相當火爆。

同為創黨委員之一嘅李偉儀透露，估計至今有二百幾人退黨，其中二十幾人為海外黨員；但現任主席陶君行就話，截至尋晚只確定有十八人退黨。毓民同大舊就唔肯講，李偉儀就估估吓，咁點得o架！容乜易搞咗盤糊塗帳出嚟，倒不如攤盤數出嚟，睇吓邊個講真話啦！

另外，疑似任亮憲強姦案嘅女事主亦對毓民同阿陶反枱有感，喺網誌上話：「變，是永恒不變的，感情如是，政治如是。」總之就繼續抽水。