政情：肥亨點出港三大死穴
兩年前因病辭官嘅中策集團主席馬時亨，尋日出席浸會大學僱主午餐會演講時，提出香港正面臨三大挑戰。首項挑戰係生活環境，肥亨話外資公司對空氣質素同教育配套要求好高，偏偏香港空氣質素差，國際學校學位又不足。
第二項挑戰係營商環境，肥亨話曾經聽過好多外國企業反映，指香港甲級寫字樓租金高昂，想搵二十五呎地方都搵唔到，被迫轉到其他城市發展，加上商人經常被指「官商勾結」，實在影響跨國企業來港設立亞洲區總部嘅決定。最後一項挑戰係缺乏人才，話香港成功全靠人才，但現今年輕人競爭激烈，所以要不斷自我增值。
話鋒一轉，佢將矛頭指向香港最大嘅僱主—政府，話無法吸納社會精英投身政務官（AO）行列。佢表示依家做AO得唔到社會尊重，憂慮公務員隊伍嘅離心影響管治。