政情：經濟動力年宵賣咕
嚟緊呢兩年係選舉年，對於要直選嘅政黨嚟講，農曆新年係同選民接觸嘅大好機會。不過對直選似乎興趣唔大嘅經濟動力，今年一樣擺檔賣精品。為乜？
經濟動力立法會議員Jeffrey林健鋒尋日介紹佢哋將會喺年宵發售嘅暖手咕，分別有平裝版同電熱版兩款，盛惠五十八蚊同六十八蚊，一次過買晒就一百蚊搞掂，而佢亦會抽空到維園做生招牌。
其實呢次佢哋會幫一個成立咗只係一年左右、叫做食物寧基金嘅團體籌款，呢個基金專門收集五星級酒店賣唔晒嘅食物，轉贈有需要人士，至今已經有二十一間酒店支持。Jeffrey話靠政府處理廚餘就唔掂㗎嘞，所以打算同食物寧長期合作，希望今年年宵有好成績啦！其實直選與否，政黨都唔能夠閉門造車，經濟動力肯企出嚟係好事，但係市民接唔接受就有待觀察嘞！