政情：發叔被圍針有排煩

鄉議局主席兼行政會議成員劉皇發，日前以大比數當選連任屯門龍鼓灘村代表，但並唔代表佢可以就此避過倒劉勢力追擊，以及洗脫之前嘅漏報利益醜聞。尋日又有民調指發叔喺五大行會成員裏面民望包尾，連佢名下嘅酒樓出錢贊助區議會搞春節燈飾，都畀人質疑涉濫用職權同公帑，簡直好似畀蜂群追住係咁針，睇嚟佢仲有排煩！

濫用公帑宣傳？

港大民意研究計劃上禮拜用電話抽樣訪問咗逾五百名市民，先選出知名度最高嘅五位行會成員，然後再就佢哋嘅表現評分。結果身兼港交所主席嘅夏佳理，以五十三點六分再次排名第一，其次係行會召集人梁振英、工聯會嘅鄭耀棠同建仔嘅劉江華，發叔嘅評分雖然已較三個月前啱啱爆出醜聞前升番些少，但仍然同第四位嘅劉江華相差多達十一分，以三十七點六分排第尾，距離合格好遠。

除咗民望評分包尾，我哋尋日又收到讀者投訴，指發叔名下一間喺大埔區嘅酒樓，附近築起咗一幅超巨型春節燈飾牌，上面大字標題「大埔區議會贊助　XXX酒家致意」，質疑有人濫用職權同公帑，為發叔宣傳私人生意。

我哋問過相關人士，發現實情並非大埔區會貼錢幫發叔宣傳，而係間酒樓畀錢贊助區會搞活動。原來大埔區會每年都會撥款三、四十萬元搞聖誕同春節燈飾，再由大埔商會向該區商戶募捐多十幾萬元湊數，據聞今次發叔間酒樓捐咗約三萬元，按一貫做法可以喺部分燈飾牌上冠名，唔涉及違規或濫用公帑宣傳。

始終區會嘅撥款都係公帑嚟，點使當然會畀人到實，但呢宗投訴或多或少都反映到有關發叔嘅是是非非，肯定唔會因為村選結束而輕易斷尾。