政情：搞搞政：廣告登錯字葉劉丟架

新民黨主席葉劉淑儀向來對英文要求高，最經典一幕係○九年去信立法會內務委員會主席劉健儀，點評政務司司長唐唐投訴社民連三子爆粗掃場嘅信中，英文文法錯誤連連，成為政壇熱話。

新民黨尋日喺多份報章賣廣告，公告天下政黨成立，點知串錯「就職禮」嘅英文「Inauguration」，寫成 「Inaugueation」。咁都錯得？葉劉解釋喺前日就職禮結束後，三名職員攞住寫住「新民黨成立典禮」中英文大字布景板前嘅大合照，趕去報館付印，點知照片反光，職員要臨時「加工」，用手填畫睇唔清楚嘅英文字，忙中有錯，r當e，串咗「Inaugueation」出嚟。

雖然係職員手民之誤，但變相打爛咗葉劉英文了得嘅齋缽，呢次可謂老貓燒鬚。佢半嬲半笑咁話：「簡直令我『蒙羞』，大家都知我一向對英文睇得好緊o架嘛！」