路上多醉駕 香港人人怕

治亂世用重典，治醉駕當然唔可以例外喇。舊年平安夜喺秀茂坪醉酒駕駛撞死好老師諸志成嘅被告，尋日喺區域法院判入獄四年及停牌五年，咁算唔算係重典呢？見仁見智喇，相對於其他同類案例，今次判刑都唔算太輕嘅，不過咁，醉駕殺人罪無可恕，殺一人只換來四年監禁，司法機構始終都係仁慈咗啲。正如死者家人質疑，停牌五年實在太短，應該加長。

係咯，根據今次判決，被告出獄一年之後就可以重新考牌揸車，到時邊個可以保證佢會改善駕駛態度呢？其實，法官自己都識講喇，被告攞咗車牌唔夠一年內，多次違反交通規則，案發當日同朋友飲通宵，飲完幾支烈酒仲揸車，唔止超速，更冇理會同車朋友勸喻，逢車過車一路狂飆，卒之失控釀成大禍，奪去一名好老師嘅寶貴生命，破壞一個幸福美滿嘅大好家庭。

好明顯，被告駕駛態度極之惡劣，完全冇考慮醉駕嘅嚴重後果，更冇考慮其他道路使用者嘅生命安全，闖出咁大嘅禍，淨係停牌五年根本唔可以反映事件嘅嚴重性，亦唔可以起到足夠嘅阻嚇作用。查實，如果有關部門對醉駕者從不手軟從不姑息，駕駛者一定有所顧忌，又點敢以身試法，草菅人命吖。

講到尾，醉駕之所以屢禁不絕，奪命車禍之所以無日無之，皆因當局執法不嚴，量刑過輕。就以舊年農曆新年前夕落馬洲發生嘅嚴重車禍嚟講，肇事貨車司機醉駕害死六條人命，結果只係被判入獄六年，唔止遠低於危險駕駛引致他人死亡可判十年監禁嘅最高罰則，出獄後仲可以再次考牌揸車。唔怪得有死者家屬指「一條命坐一年」刑罰太輕，社會各界亦認為判決毫無阻嚇力，律政司惟有向上訴庭申請加刑，遲啲至有判決。

事實證明，對駕駛態度極度惡劣、屢犯不改者判處終身停牌，係打擊醉駕、危駕嘅最有效辦法。前排當局修訂法例，對酒後駕駛採取三級制刑罰，飲酒愈多，刑罰愈重。話時話，遲到好過冇到，修例好過唔修，問題係，如果司法機構照樣好似以前咁仁慈咁手軟，有法例等於冇法例，咁始終都係嘥氣嘅啫。

好老師諸志成嘅遺孀苦口婆心勸喻所有駕駛者，飲酒或者服藥之後千祈唔好揸車，「希望每個人都做個盡責嘅司機」。冇錯喇，人命關天，每個人都應該做個盡責嘅司機，而當局更應該做個盡責嘅政府，絕對唔可以繼續姑息馬路殺手。「路上零意外，香港人人愛」，高官嗌口號就叻喇，可惜咁多年來大家見到嘅係，「路上多醉駕，香港人人怕」，叮！