政情：搞搞政：林健鋒是但噏拖延最低工資

本港首個最低工資水平鐵定於時薪二十八蚊，雖然同勞工界嘅理想水平有段距離，但為咗大眾基層市民着想，各工會代表已經諗住硬啃。有立法會議員打算做垂死掙扎，喺立法會提出修訂，希望將最低工資嘅實施日期提早三個月到二月一號，咁商界又點睇呢？

立法會總商會代表、經濟動力召集人林健鋒（Jeffrey）尋日喺大氣電波話，好難支持提早實施最低工資，因如果提早到二月一號，撞正年廿九，公司要清數，加埋出雙糧花紅，老闆們手頭緊，唔適合加人工。

如果係三月一號，佢又話製造業同出口界都仲係淡季，個個老闆喺度數手指，要額外拎錢出嚟加人工都好難喎。主持人聽到佢咁講都開始冇癮，主動接波，話都冇理由四月一號愚人節嚟推最低工資啩？

依家通脹殺埋身，升斗市民都年關難過啦！Jeffrey簡直喺度是但噏，講堆謬論都係要顧住商界啫，咁佢有冇諗過小市民點算呢？