政情：郭位精研烤牛仔骨食譜
生於台灣嘅香港城市大學校長郭位，除咗識飲識食外，仲會親自下廚，但自○八年來港上任後，佢忙到入唔到廚房，英雄無用武之地，尋日佢就趁同傳媒搞咗個聖誕新年BBQ，來港後第一次烤肉，仲親自整秘製韓式牛仔骨、韓式雞翼添！
郭校長為今次BBQ親力親為，事前仲參考埋韓式食譜睇吓點醃肉添！讀開理科工程學嘅佢，原來對烤肉都好有心得，烤肉時有板有眼，燒出嚟嘅牛仔骨又鬆又香。
點解咁好效果？校長話，牛仔骨曾經用啤酒醃過，皆因啤酒內嘅二氧化碳滲透入牛肉，加熱後二氧化碳發脹，就會令牛肉變得鬆軟，仲話要用埋切粒嘅雪梨醃牛仔骨，咁樣牛肉就會又香又甜嘞！
郭校長喺聖誕期間都有離港，但唔係度假，而係專程為咗招生而去台灣兩日，會見台灣學生，希望吸引到更多台生到城大升讀大學。
入得廚房嘅郭位，烤肉時有板有眼。