政情：金融專才唔跟葉劉埋堆

匯賢智庫創辦人葉劉淑儀牽頭創立嘅新民黨，領導層就職儀式下月九號舉行。葉劉正忙於為新民黨招賢納士，不過匯賢智庫原有班底中，包括佢曾力撐參選薄扶林區議會補選嘅牛津尖子劉應東在內嘅多名金融專才，送咗檸檬畀葉劉做聖誕禮物。

劉應東承認冇跟葉劉一齊過檔新民黨。佢解釋，葉劉有邀請佢入黨，但佢喺投資銀行工作，若明刀明槍加入政黨，要向公司申請，難度好高，所以知難而退，打消入黨嘅念頭。佢仲話擔任匯賢智庫名譽財務顧問，其實屬義工性質，葉劉旗下尖子如雲，少佢一個唔少，相信對新民黨唔會有乜影響喎。

正陪家人遊印尼嘅葉劉承認，匯賢智庫舊有班底中，的確有人因從事金融或喺外資企業打工，唔方便加盟新民黨，佢非常體諒，又強調有關人等只佔匯賢智庫極小部分，對新民黨冇影響。至於人數有幾多，佢只係話：「有三幾個，唔一定係小朋友，大人都有。」