政情：「情敵」講好話任亮憲有朋友

社民連成員、「維園阿哥」任亮憲涉嫌強姦非禮案鬧得滿城風雨，其前女友周澄更多次公開批評佢人格有問題，咁周澄嘅前男友、社運人士林輝對任亮憲呢個「情敵」有乜評價呢？

喺尋日一個公布由網民選出嘅二○一○年風雲人物選舉活動中，近期搞到一身蟻嘅任亮憲憑成功活化《城市論壇》嘅「功勞」攞到風雲男士第三位；「80後」青年、「公投」五子同菜園村村民亦分別膺風雲組合嘅頭三名。

心水清嘅讀者都應該記得「80後」青年林輝係周澄嘅前男友，林輝尋日都有出席頒獎禮，之不過，平時鍾意出風頭、搶鏡嘅任亮憲竟然冇到場，唔知係咪有心避席而拒絕赴會呢？否則兩人同場嘅場面都會幾趣怪。

真的假不了膺年度金句

林輝話同任亮憲相識一場，見到佢都唔會尷尬。佢仲話希望警方可以快啲決定是否落案起訴佢，唔好喺度dum波鐘死拖，否則對大家都冇好處。睇嚟林輝冇趁機向「情敵」落井下石，似乎仲幫佢講好說話喎。

喺風雲金句方面，陳志雲年中因涉貪污案被揭後講嘅「真的假不了」贏得第一名；白鴿黨副主席劉慧卿因不滿社民連唔畀佢哋參加七一遊行而爆出嘅「個遊行係你嘅咩？」就屈居第二。卿姐對奪獎好意外，仲即場以非常溫柔嘅聲線重新演繹得獎金句，令到全場爆笑。佢話如果畀佢揀，佢會揀中學老師吳美蘭喺高官落區sell政改時，毫不留情講嘅「我要有權選特首」，仲笑言煲呔曾就政改日日高喊嘅「起錨」口號，唔使諗一定包尾。

社民連「長毛」梁國雄就因早前失言，話白鴿黨元老司徒華「癌症上腦」，而被提名為風雲(火羅)人。長毛話好多人都叫佢去探正喺醫院養病嘅華叔，但仲未能抽出時間，又話佢識華叔仲早過好多白鴿仔，直言佢同華叔嘅關係唔到佢哋評論喎！