熱帶語林：維基解密 廟祝解籤
熱帶語林：維基解密 廟祝解籤
有個港女打算前往南韓首爾做一做面子拆建工程，順便修一修日走下坡的事業線，失驚無神聽到北韓炮打不知哪一個島，嚇出一身冷汗。為保出入平安，港女跑到廟宇求籤，看看該否如期踏上整容之旅。
港女：廟祝呀廟祝，我求咗乜嘢籤呀？上籤定下籤？籤文又講乜？
廟祝：呢一支籤話呢，凡事可問「維基解密」。
港女：吓？維基解密乜料呀？
廟祝：此乃新近人氣急升之生神仙，洩露天機之靈驗無可比擬。維基解密創辦人名叫阿桑奇，準過黃大仙，勁過觀世音，僅僅次於現已仙遊的神算保羅八爪魚。
港女：咁猛料？我可以點樣請教阿桑奇呢？
廟祝：不怕不怕，別急別急，由於時間關係，本人已為閣下事先預備好維基解密，籤文如下：中國視平壤政府為寵壞的孩子，準備放棄北韓。
港女：嘩！好深奧呀！唔明解呀！
廟祝：不怕不怕，別急別急，我為你打一個譬喻。北韓係爛仔，中國係大佬，爛仔兇神惡煞收陀地，要求街坊南韓交保護費，不交就打打殺殺。美國雖然名義上係警察，不過仍然忌中國三分，所以按兵不動。於是乎，爛仔有恃無恐不斷尋釁滋事敲詐利益。
港女：咦，我好似有少少明白，中國準備放棄北韓，等於爛仔不敢放肆。
廟祝：施主聰慧，一語中的！
港女：好嘢！維基解密萬歲！我可以放心飛去首爾隆胸咯！