政情：阿人鐵頭仁為禮服煩惱
政情：阿人鐵頭仁為禮服煩惱
諾貝爾和平獎頒獎禮下禮拜五舉行，內地異見分子劉曉波冇機會親自去領獎，反而支聯會副主席李卓人同秘書何俊仁有份撐場，呢個盛會出咗名講究衣裝，阿人同鐵頭仁為套衫好苦惱。
佢哋兩個話晒都係尊貴嘅立法會議員，唔會搞到冇衫着呀嘛？諾貝爾和平獎頒獎禮大會規定，所有出席嘉賓必須穿着正規燕尾服（踢死兔），好多得獎人或嘉賓都要提早去到當地做，佢哋又點呢？
唔知邊度買中山裝
阿人話，西裝佢有，但踢死兔呢類隆重兼正式嘅禮服，佢就連結婚都冇着過。鐵頭仁仲搞笑，話必要時拎番結婚嗰套出嚟，但十成九都着唔落啦。鐵頭仁再三了解過，話原來着中山裝都可以。
一輪商討之後，佢哋兩個決定着中山裝出席，但問題未解決喎，事關佢哋都冇中山裝，亦唔知邊度買，結果都係要向朋友求救。
鐵頭仁（左）同阿人（右）為出席下禮拜五諾貝爾和平獎頒獎禮嘅衣着而躊躇。