政情：搞搞政：田二少扯火Miriam疲於奔命

早兩日我哋先同大家講過前富貴黨中常委田北辰高調退黨後另結新歡，搭上匯賢智庫嘅葉劉淑儀，搞到佢同富貴黨嘅和平分手協議都即時無效。尋日田二少喺報章撰文，力數富貴黨「趕盡殺絕」，仲質疑佢哋失民心、議席大減，激到舊愛、黨主席劉健儀（Miriam）即刻跳出嚟撲火。Miriam自嘆孤苦時，又話唔敢同二少嘅大佬田北俊提件事，費事田少心臟負荷唔嚟喎，而田少稍後出席黨嘅會議時，原本笑盈盈嘅佢一聽到細佬個名，就黑面走人。

自從田二少決定離黨，Miriam就忙於面對各方質疑富貴黨進一步泡沫化嘅火頭，尋日田二少篇文章無異於再燒一把大火，既質疑富貴黨嘅路線遠離群眾，又質疑該黨高層使橫手阻止田二少帶個職員離開。

畀人數到體無完膚嘅Miriam話感到非常痛心同費解。講到同田二少「分手」，佢話雙方並唔存在大分歧，唔明點解田二少要踩到富貴黨咁唔掂；至於員工一事，Miriam更話唔明田二少有幾「孤身」，事關佢一出去已有葉劉呢個新歡，Miriam仲自嘲話：「我覺得我孤身過佢囉！」