政情：郭家鐵三角影威水相

新鴻基地產副主席郭炳江尋日獲公開大學頒授榮譽工商管理博士學位，郭家由郭老太鄺肖卿親自率領打氣團到場力撐，郭老太同二仔郭炳江、細仔郭炳聯高調咁影靚相，「鐵三角」陣容威盡全場，精神奕奕嘅郭老太全程心情勁靚，應記者要求擺咗唔同姿勢影相。

郭炳江見阿媽咁開心，就透露阿媽就嚟過生日，全家人會食飯慶祝。咁打算送咩禮物畀媽媽呀？郭炳江睩大隻眼，表情趣怪，五秒鐘後先緩緩吐出幾個字：「呢啲嘢係老婆諗嘅！」不過，郭老太乜都有，送禮物畀佢又要有驚喜效果，呢個任務真係難過賣樓好多。可惜尋日郭炳江太太冇嚟到，唔知佢係咪忙緊呢個任務呢？

尋日現身撐場嘅一眾新地高層，包括執董陳啟銘、陳鉅源、鄺準、黃植榮同陳國威。當中以鄺準最引人注目，事關佢唔止係集團元老級人物，又係郭老太嘅細佬、郭炳江幾兄弟嘅舅父，但佢為人好低調，冇喺鏡頭前現身。尋日獲公大頒授榮譽博士嘅仲有曾任港交所行政總裁嘅數碼港管理公司主席周文耀、著名導演許鞍華同順德聯誼總會榮譽會長胡永輝。