政情：陳詠梅「捨得」提前退休
政情：陳詠梅「捨得」提前退休
同廉政專員湯顯明嘅一段官場地下情曝光後，入境處助理處長陳詠梅（Helen）最近又有新動向，佢捨棄年薪過百萬嘅高職，提早三年告別官場。離開工作咗二十八年嘅入境處，Helen最難忘嘅經歷係四出游說其他國家接受特區護照，同二十八年嚟喺處內多次擔任開荒牛嘅事。
Helen喺港大主修化學，加入入境處時都唔知份工做乜，咁多年嚟，由旅遊證件、特區護照免簽證，到投資移民、專才優才等，佢都係開荒牛，一朝捨棄，真係百感在心頭。佢話近年愛上國畫、書法甚至古琴，因為「做人要有捨先有得」，所以佢拋開高職，但求有更多時間練書法、畫國畫、練古琴。睇嚟佢想做個琴、書、畫皆精嘅才女多過想做官場女強人噃。
熱愛中國文化嘅陳詠梅即席揮毫，寫嘅正係「捨得」兩個字，而背後嗰幅觀音像亦係出自佢手筆。