政情：馮程淑儀明跣工聯會

高官同政黨有好多枱底協議，大部分都唔會曝光。好似申亞諮詢工程結束後，官場展開狂風掃落葉嘅游說，康樂及文化事務署署長馮程淑儀日前拖住兩個副手同喺立法會擁有三票嘅工聯會見面，事後，工聯會議員話取得馮程淑儀嘅承諾，亦願意支持政府申亞。點知馮程淑儀尋日即刻出稿澄清冇向工聯會做過乜嘢申亞承諾，仲話見面時根本冇傾過申亞添。到底呢鋪係馮程淑儀被人綁咗上靶吖，定係工聯會講大咗呢？

建仔開始軟化

不過，工聯會立場鬆動咗之後，連一直堅稱唔支持嘅建仔都開始軟化。據建仔高層話，如果民意調查顯示申亞嘅市民多過一半，佢哋都會重新考慮喎。似乎，一場大轉軚已經醞釀緊。

件事嘅起源係工聯會早前開列申亞「議價」條件，包括重建元朗大球場同康文署公共圖書館轄下合約員工轉職公務員，講明如果政府答允，支持申亞絕對有得傾。工聯會呢一招本來係想喺新西插旗兼攞彩，但政府求申亞心切，結果馮程淑儀日前就急急同「阿王」王國興及潘佩璆會面，事後阿王向傳媒報喜，指馮程淑儀答應晒佢哋嘅所有條件，佢亦要守道義，個人傾向支持政府申亞。

封定議價後門

馮程淑儀搞掂工聯會本來係大功，點知佢竟然高調出稿，澄清會面「目的純粹是聽取持份者對公共圖書館未來的人力資源安排」，過程冇提及申亞，好似摑工聯會一巴。佢出稿後，宣布承諾嘅阿王講申亞嘅立場亦冇變，足見佢對會面目的嘅理解同馮程淑儀好唔同。政圈口痕友話，馮程淑儀嘅動作係有目的嘅，由於仲有黨派諗緊轉向，為免個個黨都好似工聯會咁公開議價，所以先正視聽。