SUN世代:型男仙履奇緣

型男麥柏靈（Bertrand）高大靚仔，但絕非虛有其表，而是才能與理想兼備。他在英國頂尖貴族學校求學時，每天都由宿舍走到遙遠的課室，風雨不改，連鞋都行穿了，深感好鞋子好重要，萌生創立鞋履生意的夢想。畢業後，他在名企累積知識與經驗，並靜待時機。一年前，如命運安排般，他遇上難得的機會。「夢想要無限決心同努力先可達到！」他全力以赴，決不讓良機溜走，最後終於圓夢，擁有屬於自己的鞋履王國。　　　　　　　　　　　　　

在英國長大的Bertrand，就讀哈羅公學，是世界聞名的貴族學校，學生不是皇室成員，就是富豪後代。你或會想像他過着奢華的學習生活，但他卻以「苦」來形容中學生涯：「學生個個出自名門，好大競爭，令我學識堅毅不放棄，凡事要做到最好。中學嗰五年決定咗今日嘅我！」那時期，他更萌生創立鞋履生意的夢想。「由宿舍去課室要行好遠，日日都係咁行，連鞋都行爛埋！嗰時感受好深，覺得舒服耐用嘅鞋好重要！」

倫敦迷路遇良機

他在倫敦大學取得化學及工商管理學位後，曾在名牌Louis Vuitton當管理實習生，及在著名拍賣行擔任鐘錶專家，漸感志不在此：「大機構有好多層，諸多限制，冇發揮空間。當時愈做愈明白，打工根本唔係我想做嘅嘢。」當時，他盡量累積知識與經驗，增值自己，並等待創業時機。

直至去年七月的一天，是命運的巧妙安排，他遇到千載難逢的良機。那次Bertrand與女友到瑞士旅遊，中途在倫敦停留一日時，因迷路而經過歐洲著名鞋履設計師Rupert Sanderson的店舖。雖他未認識這品牌，但卻對其高跟鞋一見傾心：「我一向好欣賞精緻、簡約又有內涵嘅嘢，佢嘅高踭鞋正正就係呢種，加上每對都係人手造，係好靚嘅手工藝品。女朋友忍唔住帶咗幾對返屋企！」

後來，他發現女友每次穿起該品牌的高踭鞋時，都引來途人注目。他笑說：「好多人望佢對腳，最初我仲以為佢對腳有咩問題，原來係對鞋吸引咁多目光！」女友親身體驗後，大讚五吋高嘅幼踭鞋竟非常舒適！「一對鞋舒唔舒服係最緊要！高踭鞋做到又靚又舒服真係好難得！」Bertrand認為機會難逢，於是盡一切努力爭取。

棄高薪厚職圓夢

Bertrand毅然辭去高薪穩定的工作，花時間做透徹的市場研究，準備巨細無遺的計劃書，再以電郵及電話聯絡品牌，更專程前往英國與Rupert Sanderson本人商討發展。他認真及熱誠的態度，令他成為該品牌的亞洲區合夥人，在港開設首間國際旗艦店。Bertrand終於圓夢，擁有自己的鞋履王國，但卻未停下腳步，已向着下個目標進發：「希望擴展業務，增加知名度，令更多女士可以着到又靚又舒服嘅高踭鞋！」

麥柏靈Bertrand Mak小檔案

年　　齡：28歲

婚姻狀況：未婚

學　　歷：英國哈羅公學、倫敦大學英皇學院化學及工商管理學位

現　　職：Rupert Sanderson亞洲區合夥人

工作經驗：Louis Vuitton管理實習生、Christie's拍賣行鐘錶專家

才　　能：鋼琴演奏級